الأحد - 09 اغسطس 2020

حديثي الولادة ورعايته من الشعر حتي القدمين

  • mahmoud
  • 12 ديسمبر 2019
حديثي الولادة ورعايته من الشعر حتي القدمين

حديثي الولادة ورعايته

من الشعر حتي القدمين

 

لا شك من ان رعاية حديثي الولادة مهم وخاصة اذا كان هو المولود الاول في الاسرة الصغيرة .

فضيف جديد دخل الاسرة وهو مفتاح السعادة للاب والام ولذلك العناية حديثي الولادة جيدا.

عشان نتكلم عن رعاية حديثي الولادة فترة الشهور الاولي هنقسمها لعدة مقالات بلغة

شبة عامية عشان تبقي بسيطة وسهلة عن رعاية ونمو طفل حديثي الولادة .

⇐ الشعر والرأس لحديثي الولادة :

♦ مفيش اي مشكله من شكل الراس في اول حياة الطفل بتاخد الشكل الطبيعي مع الوقت يوجد فيها فتحتين :

1- خلفيه ودي بتقفل من الولاده وحتي ٣ شهور.

2- الاماميه ودي بتقفل من ٩ شهور ل ١٨ شهر.

♦ نمو الشعر للطفل يبدا من سن سنتين :
يعني الواد مفيش شعر..البنت هيبقي شعرها خفيف مفيش الكلام ده كله بعد سنتين.

⇐ العين لحديثي الولادة :

♦ يفضل مسح العين للطفل بمياه دافيه في نفس اتجاه الرموش

♦ انسداد القناه الدمعيه وارد في الاطفال بنسبه كبيره ودا بيسبب دموعه الكتيره.

– وعلاجه المساج للقناع الدمعيه يوميا .

– ولو حصل افرازات قطرة (توبرين) واخواتها.

– ممكن نلجيء لطبيب رمد لعمل عملية بسيطه لفتح القناه الدمعيه لو استمرت لبعد

      سن سنه ولكن بنسبة ٩٠٪ بتختفي قبل السنه

⇐ الانف لحديثي الولادة

الخنفره ودي  اشهر شيء في الاطفال حديثي الولاده ودا بسبب ان التجويف الانفي

لسه صغير وبيتقفل بسرعه

– وعلاجه محلول ملح اوتريفين بيبي واخواتها قبل الرضاعه وكترها لا يضر.

– بخاخ مياه البحر زي فري نوز او فيزيومير بيبي نتايجه هايله في الموضوع ده وآمن جدا

⇐ الفم لحديثي الولادة

الفطريات ودي من اكتر المشاكل حدوثا
وعلاجها نظافة ثدي الام  ودكتارين جيل واخواتة او نقط نيستاتين قطاره كل ٦ ساعات  واخواته في

فم الطفل وعلي اللسان.

– اللسان المربوط ودا لسان بيكون الجزء الامامي للسان مرتبط بقاع الفم عن طريق

شريط نسيجي سميك يعوق حركة اللسان

ـ اعراضه شرقه وصعوبه في الرضاعه وبالتالي الم ف الثدي للام واحتقان نتيجة قلة

رضاعة الطفل وتراكم اللبن بالثدي ودا مش بيحصل في كل الحالات .

– علاجه : اختلفوا عليه ومازالوا مختلفين .

– البعض قالوا لو الطفل فيه اعراض من اللي ذكرتها بيتعمله عمليه بسيطه جدا

ومفيش لها اي مضاعفات بيقطع الجزء النسيجي اللي تحت اللسان وياريت لو في اول

ايام الطفل .

– والبعض قالوا نسيبه عادي جدا ونشوف لو حصل اي حاجه من اللي ذكرتها تتعمل

وبالاخص انها احسن وقت لها من بعذ الولاده حتي سن سنه .

♦ التسنين :

– من سن ٦ شهور لسن سنه وشهرين مش بنقول اتاخر غير بعد ١٤ شهر ومفيش

اسنان لسه.

– اعراضه بتبدأ من ٤ شهور علي شكل حراره خفيفة مع بعض العصبيه وفقدان بسيط

للشهيه.

– علاجه : قطنه بمياه بارده ونمشيها ع اللثة كمساج وسيتال مسكن .

اقرأ ايضا : مرحلة التسنين عند الاطفال

اقرأ ايضا : تأخر التسنين عند الاطفال

⇐ الصدر لحديثي الولادة

كِبر حجم الثدي للرضيع .

– دا اضطراب هرموني بيحصل بعد انفصال الطفل عن الام في الولاده.
علاجه : ولا حاجه
الاخت اللي بتقول نعصر وكلام فاضي . حرام عليكي بطلي فتي

⇐ البطن لحديثي الولادة :

– الانتفاخ ودا اشهرهم :

ـ الام عليها عاملان هما :

اكلها : تبعد عن المسبك والموالح والكافيين والشيكولا والمياة الغازية .

واسلوبها في الرضاعه : وضعها ٩٠ درجة ووضع الطفل ٤٥ درجه وبلاش رضاعه

عمال علي بطال .

– اقل وقت ساعه واقصي وقت كل ٣ ساعات

مش كل طفل بيبكي يبقي جعان بس يا عزيزي الام

ـ الطفل: مساج للبطن وسايمثيكون واخواته

⇐ السره لحديثي الولادة

– الكحول ٧٠ ٪ رش باستمرار مع التهويه و الطفل ياخد دش عادي والله والميه تيجي عليها عااااادي .

– ونخلي بالنا ان البامبرز يكون تحت الحبل السري علشان الطفل لو عمل حمام ميوصلش ليه.

– ومفيش اي مشكله لو اخدت وقت موقعتش كلام الاكاديميه الامريكيه ٢٠١٥ قالوا معاك

ل ٨ اسابيع.

– ونزول نقط دم من السره مع بعض الاطفال شيء طبيعي جدا في اول شهر اضطراب هرموني وبيروح لحاله .

♦ الفتق السري : ضعف في جزء عضلي في البطن ومفيش منه قلق وبيتحسن

تلقائى بدوان حزام سُري ولا لزقه ولا كلام فاضي بل بالعكس استخدام الحاجات

دي بتزود المغص عند الطفل وبتساعد في حدوث قيء.

– التحسن بيكون من ٦ شهور لسنه والتدخل الجراحي بعد ٥ سنوات لو كانت لسه موجوده اساسا .

♦ ورم السرة الحُبيبي: وده جزء لحمي بيفضل بعد ماالحبل يقع وممكن يكون معاها

افرازات صفرا ودي بتحتاج لمضاد حيوي موضعي مع الكحول ولو مفيش تحسن بتحتاج

لكيّ بنترات الفضه او ربطها لو ليها عنق.

– زيادة عدد مرات البراز في اول فتره عادي جدا طالما بيرضع وبيزيد في الوزن مش اسهال وربنا ياحاجه .

♦ الترجيع : لو بيرجع وبيزيد في الوزن يبقي ارتجاع فسيولوجي او رضاعه زايده.

– نظمي الرضاعه وكرعي الطفل كويس وتابعي الوزن لو بيزيد يبقي تمام.

♦ الامساك : في اول حياة الطفل مفيش قلق ودا بنسميه (امساك وظيفي) ليه

علاقه وطيده بأكل الام لو بترضع طبيعي فظبطي اكلك زي ماقولنا فوق في الانتفاخ .

– وعليكي وعلي تمارين الامساك وزيت اللوز ٥ نقط ٣ مرات مع تظبيط اكلك وبلاش

جليسرين لبوس غير بعد ٣ ايام ع الاقل بدون حمام .

⇐ منطقة الحفاض لحديثي الولادة :

– الطهاره : من اول يوم وحتي الاربعين ودا افضل وقت ليها
– الميه علي الخصيه بتروح مع الوقت
– الخصية المُعلقة : ممكن تكون (خصيه متجوله) بتطلع وتنزل ودي مفيش منها قلق.

– وفيه نوع لازم تدخل جراحي او علاج هرموني وافضل وقت ليها من ٣ -٦ شهور وقبل مايتم السنه.

– واكتشافها بيكون عن طريق عمل سونار علي الخصيتين بعد التأكد من عدم وجودها بالفحص الاكلينيكي .

– التسلخات: التهويه والتجفيف .

استخدام نوع بامبرز جيد.

عدم استخدام المناديل المبلله.

استخدام كريم يحتوي علي الزنك مع تغيير كل حفاضه .

اقرأ ايضا :

1- علاج تسلخات الاطفال ومشكلة تسريب الحفاضات

2- استحمام الطفل الرضيع

3- تغذية الطفل من عمر الشهر حتي عام

⇐ القدمين لحديثي الولادة :

– العيوب الخِلقيه .

– القدم المخلبيه ودي اسبابها عدم التوازن بين قوه العضلات و الانسجه المسؤوله عن

شد القدم للداخل .

– مقابل العضلات المسؤوله عن شد القدم للخارج.

علاجها: عن طريق دكتور عظام اطفال الجبيره والجراحه ومن اول يوم .

– هتسمعوا صوت (طقطقه) في بعض الاطفال في اليدين والأرجل متقلقوش دا مش

من العظام دا صوت اتساع الاربطه بين المفاصل.

⇐ معلومات ع الماشي
*********************

المبتسرين …بيتولدوا قبل ٣٧ اسبوع من الحمل
قليلي الوزن….وزنهم بيكون اقل من ٢.٥كجم

ـ دول محتاجين معامله خاصه وبالاخص درجة الحراره لازم تدفئه .

ورضاعتهم بتكون بأسلوب معين لان مقدرتهم علي المص بتكون ضعيفه وغالبا بنشفط

لبن الام وبياخدوا لبن من نوع معين خاص بيهم .

– وبنزود حجم الرضعه تدريجي علشان ميحصلش مشاكل في الامعاء.

– وبنطمن لما وزنهم بيزيد فوق ٢.٥كجم وبنغير اللبن لانواع تتناسب معاهم .

– لازم ياخدوا فيتامينات من اول يوم تحتوي علي فيتامين A,K,E,D وحديد.

– فيتامينات الرضيع :

1- فيتامين D ٤ نقط حتي سن سنه.

2- فيتامين C ٥ نقط مره يوميا اول شهرين .

– بلاااااش اعشاب ولامياه حتي سن ٦ شهور .

– التوأم غالبا بيحتاجوا لبن صناعي لكن فيها امهات super woman قدروا يرضعوا

طبيعي وقصصهم ناجحه جدا.

– الوزن الطبيعي للمولود من ٢.٥ – ٣.٥ كجم

وبيزيد في اول ٤ شهور ٣ كجم بمعدل ٧٥٠ جم في الشهر

وتاني ٤ شهور ٢ كجم بمعدل ٥٠٠ جم في الشهر

وتالت ٤ شهور ١ كجم بمعدل ٢٥٠ جم في الشهر

– الطول

الولاده حوالي ٥٠ سم

وفي اول ٦ شهور بيزيد من ١٢ – ١٥ سم بمعدل ٢ – ٢.٥ سم كل شهر

وتاني ٦ شهور حوالي ٩ سم بمعدل ١.٥ سم كل شهر

– قطر الراس

عند الولادة ٣٤ – ٣٥ سم

٦شهور ٤٤ سم

سنه ٤٧ سم (نيلسون ٢٠١٥)

*** طبعا كل القياسات اللي اتكلمنا عليها تُحدد من خلال منحني النمو اللي من خلاله نقدر نقول فيه مشكله ام لا.

الدكتور اشرف قاسم

لو استفدت من المقال اعمل مشاركه علي وسائل التواصل الاجتماعي

اقرأ ايضا :

1- طرق تفتييح الاماكن الداكنة بالجسم

2- ذكاء الطفل مرتبط بوجوده وقت اطول مع والده

3- طريقة اجتياز مرحلة العض والضرب والصفع لدي الطفل

4- طريقه إعطاء حقنة عضل للاطفال اقل من عمر ٥ سنوات

5- اليوتيوب : قناة حياتك بين ايديك

%d مدونون معجبون بهذه: