الأحد - 25 اكتوبر 2020

أكل ابني امتى ؟ و اكله إيه ؟

  • mahmoud
  • 02 فبراير 2020
أكل ابني امتى ؟ و اكله إيه ؟

ابدأ أكل ابني امتى ؟و اكله إيه ؟ من الأسئلة المقلقة للكتير من الأمهات

واللي هنحاول نبسطها في المقال

♦ ابدأ أكل ابني امتى؟

خللينا متفقين إن مفيش قاعدة ذهبية لتحديد سن بداية الاكل .

بس إمتى أعرف إنّي ممكن أجرّب معاه ؟

أنا أقولِّك :

في علامات بتعرّفِك إن طِفلك مستعد يجرب إنه ياكل والعلامات دي بتنقسم لعدة مراحل :

المرحلة الأولى وبتكون في الغالب من الشهر الرّابع ل السّادس (بس مش قبل الشهر الرّابع ) :

١- قادر يُصلُب راسه.
٢- بيحرك الفم زي ما يكون بيمضغ.
٣-بيتفرج ويتابعك وانتِ بتاكلي.
٤-بيفضل جعان بعد ما يخلَّص الرّضْعة .
٥-بيفتح بُقُّه لما تِقَرّبي مِنُّه المعلقة.

المرحلة التانية وبتكون في الغالب من الشهر السادس للتامن و بيكون فيها الطفل:

١-قادر يقعد من غير ما يكون مسنود.
٢-بيمضغ كويس..طلعتله أسنان..بيعُض.
٣- يميل بجسمه لقدام لو قرّبتي منه المعلقة.
٤-يقدر يشرب كام شفطة ميه من الكوباية.
٥-بيحب يمسك الاكل بصوابعه.

المرحلة التالتة وبتكون من الشهر التامن للشهر العاشر  :

١-بيمضغ ويعُض كويس.
٢-بيحب ياكل بنفسه ومش عايز حد يأكله (بس لسه بيبقى محتاج مساعدة).
٣-بيحب يمسك الأكل و يِلْعب بيه.
٤-بيعرف يشرب ميه كويس من الكوبّاية.

المرحلة الرابعة و بتكون من الشهر العاشر للشَهر ال ١٢ :

١-بيأكِّل نفسُه كويس بصوابعُه.
٢-عايز يستخدِم المعلقة في الأكل.
٣-يقدر يمسك الكوباية بإيديه الإتنين ويشرب ميه لوحدُه.
٤-بيعرف يمضغ ويقطم الأكل بإختلاف أنواعه.

  • كل مرحلة من اللي فوق دول ليها اكل معين بكميات معينه
  • المطلوب منك بس تكوني دقيقة الملاحظة مع طفلِك عشان تعرفي هتتنقلي من مرحلة للمرحلة اللي بعدها إمتى.

 

طيب السؤال التاني نِأكل إيه في كل مرحلة يا دكتور ؟!

نجاوب على السؤال التاني

المرحلة الأولى (٤شهور : ٦ شهور):

في المرحلة دي الرضاعة ليها الأولوية الكاملة قبل الأكل بمعنى لو البِيبي جاع نرضعه الأول وبعدين نجرب ندّيه اكل.

  • الكمية:   ١/٢ : ٢ معلقة صغيرة في الوجبة.
  • عدد الوجبات: بنبدأ بوجبة واحدة و بنزوِّد بالتدريج مع الأيام.
  • نجرب نوع واحد لمدة ٢ : ٤ أيّام وبعدين نِنْقل على نوع تاني.
  • لو جربنا نوع والبِيبي تقبّله مسموح نخلطه مع نوع جديد.

طريقة تقديم الأكل :  لازم يكون النوع اللي بنقدّمه مسلوق ومهروس ومتخفف زي الميه.

نوعية الأكل: اوّل وجبة لِطفلِك يُفَضَّل إنها تكون رز مسلوق ومتخفف ب حليب الام أو الحليب الصناعي .

بعد كده الإختيارات كتير وممكن تختاري من القائمة الجاية دي

١-الحبوب:  أرز  شوفان سيريلاك أرز .
٢-الفواكه: تفاح،موز.كمثرى،برقوق،خوخ،يوسفي

٣-الخضروات: بطاطا،بطاطس،جزر،كوسة،قرع عسلي.
٤-ممنوع بروتين.
٥-ممنوع منتجات ألبان.

المرحلة التانية ( ٦شهور : ٨شهور) :

في المرحلة دي برده الرضاعة أهم من الأكل يعني نِعرِض الحليب الأول سواء طبيعي أو صناعي و بعدين الأكل.

الكمية : معلقتين كبار أو نص فنجان شاي حسب شهية الطفل.

عدد الوجبات : ٢ – ٣ في اليوم.

طريقة تقديم الأكل : بيكون مسلوق ومهروس و حاولي تعملي مزيج من الفواكه و الخضروات و جربي معاه .

نوعية الأكل :

١-الحبوب: قمح ،مكرونة حبوب المرحلة الأولى.

٢-الفواكه : عنب،بطيخ،مانجو،فراولة،توت فواكه المرحلة الأولى.

٣-الخضروات : البسلة،الفول الأخضر ،القرنبيط،الباذنجان،بصل،الفول المدمس ،العدس خضروات المرحلة الأولى.

٤-البروتين (يقدم في آخر المرحلة): صفار البيض ، الدجاج.

٥-منتجات الألبان (تقدم في نهاية المرحلة) :زبادي كامل الدسم ،جِبَن زي القريش.

المرحلة الثالثة (٨ شهور : ١٢ شهر):

في المرحلة دي الرضاعة مهمة بس بنقدِّمها كوجبة تكميلية بعد الأكل .

و لازم يوصل الطفل يومياً حوالي ٦٠٠ مل حليب سواء من الرضاعة الطبيعية أو من الصناعي.

الكمية : طبق صغير .

عدد الوجبات : ٣وجبات + ٢سناكس.

طريقة تقديم الأكل : مهروس أو مبشور او متقطع و ممكن يتمسك بالأصابع.

نوعية الاكل ⇐

-الحبوب: بيزيد على المرحلتين السابقتين البسكويت ,خبز.

-الفواكه: نقدر ندي بلح في المرحلة دي مع باقي الفواكه السابقة

-البروتين : ممكن ندى مع الصفار و بنزود الأسماك والسي فود واللحوم الحمراءفي المرحلة دي.

-الألبان: في نهاية المرحلة دي ممكن ندي كل الجِبَن بأنواعها الكريمي والتشيدر و النستو .

المرحلة الرابعة (فوق السنة):

في المرحلة دي نقدر ندخل الحليب البقري مع الرضاعة أو كرضاعة أساسية والرضاعة عامةً في المرحلة

دي بتيجي بعد الأكل واحتياجات الطفل اليومية بتقل ل ٥٠٠ مل حليب في اليوم.

  • في المرحلة دي الطفل بينضم لِأفراد الأسْرة في وجبات الفطار والغدا والعشا وبياكل عادي من أكل البيت ٢ :٣
  • وجبات سناكس طول اليوم مع الرضاعة اللي سبق وذكرناها.

-ممكن في المرحلة دي نقدم العسل الأبيض للطفل .

الدكتور / اشرف قاسم

اقرأ ايضا :

استخدام الهاتف المحمول قبل النوم قد يعرضك للخطر

طريقة عمل شوربة سي فود بالكريمة

سؤال .. جننتيني يا ماما …. ارحميني يا ست الكل

القهوة الخضراء

سؤال وجواب في عناية الشعر

طريقه إعطاء حقنة عضل للاطفال اقل من عمر ٥ سنوات

العنف الاسري تعريفه واثاره واضاره علي الاسرة والمجتمع

الفيس بوك : صفحة حياتك بين ايديك

%d مدونون معجبون بهذه: